Selasar Pena Talenta

Hata Panungkolion

Saut Poltak Tambunan, Pande Gurit

Dungkon haruar buku rongkoman puisi hata Batak Bangso na Jugul do Hami di taon 2017, sahat ma muse tuhita buku na paduahon sian amanta Panusunan Simanjuntak. Parhutahuta do Hami, i ma judul ni buku on.   Mansai las roha manjangkon haroro ni buku on, lumobi nunga pitu taon lelengna pinaima dungkon buku na parjolo taon 2017.

Di buku na parjolo, dipahimpu disi 75 gurit-gurit, puisi manang situriak. Hatiha i dirongkom marhadomuan tu ari hatutubu pa-75-hon. Di buku na imbaru on, di umurna 82 taon, dipahimpu ma 122 gurit-gurit puisi. Sian taon 2012 ma 1 puisi, 4 puisi sian taon 2013, 8 puisi sian taon 2014, 5 puisi sian taon 2015, 1 puisi sian taon 2016, 8 puisi sian taon 2017, 26 puisi sian taon 2018, 21 puisi sian taon 2019, 9 puisi sian taon 2020, 8 puisi sian taon 2021, 19 puisi sian 2022, 7 sian 2023, 5 puisi sian 2024.

Di bindu pamuhai sian angka puisi di buku on, dituntun do pajolohon puisi sian taon 2024 na dipaojak gabe judul ni buku on, Parhutahuta do Hami. Tingkos ma antong judul on marhadomuan tu parngoluanna. Ai tubu di Huta Huraba do panggurit on di taon 1942, di luat Sarulla, Pahae Jae – Tapanuli Utara. Tammat sian Sekolah Rakyat, SR, Negeri Sarulla 1956. Tammat sian Sekolah Guru Bawah, SGB  Negeri Sarulla 1959. Tammat sian Sekolah Guru Atas, SGA  Negeri Medan 1962. Sambolus jinaha, adong ma antong serep ni roha ni panggurit mamparhatutu jala mangondolhon, ia hami apala parhuta-huta do, parhuta-huta hian tahe. Di masa ni hamajuon saonari pe antong mansai maol dope luluan huta Huraba on agia marhite internet Google.

Alai molo nirimangan puisi na pamuhai i, suhar do tu pingkiran. Paradoks, kontradiktif.   Dipaboa disi naung marpulu taon mian di luar negeri – di tano sileban, nunga diebati lobi sian 30 negara. Tontu nunga somal marsaor dohot sude bangso dohot loloan saportibi, masayarakat sedunia (puisi nomor 122). Jala marhata sileban ma ganup ari. Anak sasada dohot duansa pahompu nasida pe laos maringanan di luar negeri muse, London.

Tontu nunga mansai bahat cultural shock diadopi nasida, manang budaya dohot angka hasomalan na suhar maralo jala na so hea masa di angka parhuta-huta. Godang parungkilan. Alai nunga salpu be i dibolus nasida. Hinorhon ni i – aut sugari didok, ‘sudah tak tahu aku marhata Batak’, tarjalo roha do. Hape – sahat tu hatuaonna ndada holan marsihohot marhata Batak, dilehon dope tingki dohot pingkiranna manggurit puisi hata Batak.  Asa unang punu hata Batak. Di umur 75 taon, mandapot penghargaan Rancage dope sian lembaga setara Nasional, i ma buku puisi Bangso na Jugul do Hami.

Mauliate di Tuhan, nunga be mulak ogung tu sangkena, mulak tangke tarrungrung tumopot songkirna. Sian hita laho di hita do buku on, anggiat ma sahat manghorhon tu hadengganon di habatakonta.

Horas jala gabe.

TORTOR SANGOMBAS, Jakarta,

1 Agustus 2024